Welsh Music Foundation

Dyma dalp o athronyddu arwynebol i chi - dyw’r diwydiant cerddoriaeth, fel bywyd, ddim mor syml ag y mae’n ymddangos. Y Canwr neu’r Gân sy’n cael sylw’r rhan fwyaf o bobl, ond y tu ôl i bob cân lwyddiannus, pob ffrwydrad o gerddoriaeth newydd a phob taith stadiwm wefreiddiol, mae cant a mil o bethau’n digwydd – y ‘pethau eraill yna’ fel y’u gelwir yn aml.

Mae’r ‘pethau eraill yna’ yn cynnwys: ystafelloedd ymarfer, stiwdios, rheolwyr, cyfreithwyr, cynhyrchwyr, asiantiaid, hyrwyddwyr, cwmnïau dosbarthu… Mae’r rhestr yn ddiddiwedd. Ond heb yr elfennau hollbwysig hyn, waeth i chi anghofio’ch breuddwydion.

Yn y ‘pethau eraill yna’ rydyn ni’n rhagori. Y Welsh Music Foundation yw’r man cychwyn ar gyfer unigolion, busnesau bach a busnesau newydd sydd angen gwybodaeth am y diwydiant cerddoriaeth yng Nghymru.

Yn y lle cyntaf, mae cysylltiadau – gadewch i ni gymryd eich bod chi’n artist sy’n chwilio am reolwr, yn rheolwr sy’n chwilio am label recordiau, yn label recordiau sy’n chwilio am gysylltiadau yn y cyfryngau, neu’n gwmni teledu sy’n chwilio am artist – ydych chi’n deall i’r dim…? Mae Cyfeirlyfr Cerddoriaeth Cymru’n cynnwys 1,700 o gysylltiadau mewn 65 categori.

Ar y wefan hon, gallwch chi gael gwybodaeth am seminarau a digwyddiadau, rhaglenni addysg a hyfforddiant a chyfleoedd marchnata a masnach ryngwladol, yn ogystal â gwaith y WMF wrth iddo gynrychioli buddiannau diwydiant cerddoriaeth Cymru i gyrff y diwydiant cerddoriaeth a gwneuthurwyr polisi ym Mae Caerdydd, San Steffan a thu hwnt.

Megis dechrau yw hyn – mae hefyd yn cynnwys rhestr gynhwysfawr o bynciau a Chwestiynau Cyffredin y gall staff y WMF roi help llaw i chi yn eu cylch a manylion ynglŷn â sut gallwch chi fod yn rhan o esblygiad y diwydiant cerddoriaeth yng Nghymru trwy fod yn Rhanddeiliad, neu’n Ffrind i’r WMF.

Mae hyn yn golygu ein bod ni’n eitha’ prysur, felly does dim llawer o amser gyda ni i wrando ar demos, dosbarthu tannau gitâr am ddim neu roi benthyciadau i artistiaid brynu fan ar gyfer teithio. Ond rydyn ni’n barod iawn i gyfeirio unrhyw un at y bobl a allai roi help llaw…